Ум Маани Бад Ме Хум.

Ум Маани Бад Ме Хум.
Алтан дэлхэй дээрэ амгалан байдал оршог,
дурбэн зуг, найман хизаарын халуун хушуу амитад
айха аюла угы, гэндэхэ гэн угы, орто насатай, удаан жаргалтай, yнэр,
баян, ноен, эрдэм ном, элуур энхыг эдэлжэ амгалан тайбан жаргажа суухань болтогой!

.

※♡※ Чесанский Дацан ※♡※

2 мая 2013 в 21:31

Таби наһан хүрэтэрөө хүн эхэ эсэгын буянгаар ажаһууна, амидарна. Таби наһанһаа хойшо өөрын буян олохо, үхибүүдэйнгөө түлөө маани уншаха гээд бидэндэ аба эжымнай, үбгэ эсэгэнэрнай заадаг һэн. Хүнэй наһа барахада хойтын буяндань маани уншанабди

Мүнөө хүн бүхэн шахуу эрхитэй ябадаг болоо. Урдань үбгэд хүгшэд лэ эрхи татажа, маани уншажа байдаг бэлэй. Эрхи гээшэмнай юунэй түлөө, ямар гуримаар татагдадаг юм. Эрхидэ үлгөөтэй байдаг толгой, бөөрэ, тоолуур гэдэгүүд ямар удхатайб?

Буддын шажанай эрхи зуун найма байдаг. Энэ шажанай нангин тоо гээшэ. Энэ тоодо ородоггүй эрхиин толгой гээд байна. Эрхи гурбан бөөрэтэй: хорин долоон эрхиин дараа бүхэндэ нэгэ бөөрэ. Иигэжэ хамтадаа 112 монсогорнууд үлхэгдэнэ. Заримандаа гурбан бөөрэ эрхиингээ тоо соо ороодшье байдаг, тиигээ һаа, толгойтоёо 109 болоно. Эрхиин толгой хуба шулуугаар (янтарь) хэхые оролдодог. Эрхиеэ зүүхэдээ толгойгоорынь уруунь байлгахагүй ёһотой. Маани уншахадаа, эрхиингээ толгойень алхажа татадаггүй, толгойдонь хүрөөд лэ, һөөргөө эрьеэд уншадаг гуримтай. Харин үхэһэн хүнэй буянда уншахадаа, толгой алхуулаад ото һэтэ нэгэ шэг руунь уншадаг. Тиихэдээ тоолуур татадаггүй. Энэ буян нүгшэгшэ хүндэ зорюулагдана ха юм, өөртөө буян хэнэ бэшэ.

Тоолуур тухай. Лама санаартанай эрхидэ ямаршье тоолуур байхагүй, уншаһыень Бурхан тоолохо юм гэдэг. Юрэнхыдөө, тоолуур гурбан янза: зуунай, мянганай, зуу мянганай... Зуунай тоолуур мэнэл хэрэглэгдэжэ байдаг ушарһаа бэлээр хүдэлгэхые хараада абажа, бэеэ даанги богонихон үлхөөтэй арбан сахаригууд байдаг. Эрхиеэ татажа,арбан тоолуурайнгаа захадаа хүрэхэдэнь, мянган маани уншагдаба гээд удаадахи тоолуур татагдана.

Мянганай тоолуур олонхидоо эршэлээтэй ооһор байдаг. Толгойн боориһоо эхилдэг. Эршыень һуладхаад, мянган маани хүсөөхэ бүреэ нэгэ эрхи ахижа ябуулдаг. Иигэһээр эрхиингээ нүгөө тала үнөөхи толгойдоо шахахадань, зуу мянган маани уншагдаба гээд, удаадахи тоолуур ябуулдаг. 

Зуу мянганай тоолуур удаан боложо хэрэглэгдэдэг хадань бэлээр хүдэлхэгүй сахариг байдаг. Зуу мянган маани уншаха бүреэ нэгэ эрхи ахижа, энэ сахаригаа заалаад алхуулаад, һөөргэнь жэмылгэдэг. Энэ тоолуурай бүхы эрхинүүдые юрөөлжэ хүсэхэдэнь, арбан сая (арбан миллион) маани уншагдаба гээшэ.

Эрхиеэ татаха, уншаһан маанияа тоолохо баһал онсо гуримтай юм. Зуун найман эрхи мухарюулаад, зуун маани уншагдаа гэхэшэлэн, тоолуур бүхэн зуун найман бүхэндэ ябабашье, зуу гээд лэ тоологдодог ёһотой юм. Һамааржа, һаналаа хүсэд хүрөөгүй уншаһаниие хараада абана ха юм. Эрхи заабол нара зүб эрьюулхэ ёһотой. Эрхи бүхэн бишыхан хүрдэхэнүүд гээшэ. 

Энэ хүрдын голынь эрхиин үлхөө болоно гээд бодоод үзэгты. Тиихэдээ долёоборой үзүүрһээ эрхыгээрээ эмирэгдээд, доошоо заабол нара зүб эрьелдэһээр бууха ёһотой. Монсогорхон эрхи бүхэн хурганай үндэгэнүүдтэй һайсахан үһэрилдеэ һаа, бэеын мэдэрэл үргэхэ талаар ехэ туһатай байха. Эрхы долёобор хоёройнгоо үзүүрхэнээр эрхиеэ татаа һаа, зүб гэжэ бодомоор.

Эрхи ямар юумээр хэгдэнэб гэхэдэ: зургаадай, зандан, сэндэн гэхэ мэтэ модод Энэдхэг, Жагарай орондо ургадаг тула ехэ хомор. Манай Дунда Азида саншит гэжэ модоор эрхи хэдэг юм. Мүн заанайшье һоёогоор хэдэг. Энэмнай ехэ үнэтэй ааб даа. Эрхи эрьюулхэ бүхэндөө нэгэ маани тон хүсэдөөр уншагдаха ёһотой. Яаража байгаад, дутуу ядуу олон тоо хүсөөхые оролдобол, буруушаагдана.

Маани уншажа буян хээд, удаань заабол зорюулга дурдаха ёһотой юм гээд Шэнэхээн нютагай эмшэ лама Балбар ламбагай заажа үгөө һэн. Тэрэгүйдэ эзэгүй, нэрэгүй буян гээшэ үгы болоходоо дүтэ ха юм. Зорюулга гээшэ үнэхөөр амаараа үгүүлжэ, юунэй түлөө, буян үйлэдэһэнөө, Бурханай урда өөрынгөө гуйлтые тобшохоноор хэлэхэ ёһотой. Гансал өөрынгөө хара бэеын гү даа, али гансахан өөрынгөө үри хүүгэдэй түлөө хэһэн гуйлтын сэн бага, үнэхөөр буян болохогүй.

Эхэ зургаан зүйл, хамаг амитанай амар амгаланай түлөө,үлзы хутаг үндэр заяан бадараг гэжэ заабол сэдьхэхэ, үгүүлхэ шухала. Тиихэдээ эрхиеэ эбхээд, толгойень оройдонь тобойлгоод, хоёр альган дээрээ хүндэтэйгөөр үргэжэ һүгэдэдэг, бурханһаа адис абадаг, хэлэхэ үгэеэ хэлэдэг ёһотой.

Иигэхэдээ хэһэн буян, гуйһан гуйлта зорилгоёо хүсэхэ болоно. Энээнһээ улам нэгэ иимэ ушар дурдамаар ха. Нэгэ хүгшэн маани, мэгзэм, тарни угаа хананхатайгаар, унтаагүй сагтаа отол уншажа байдаг байба ха. Үндэр наһатай болоод байтарнь, табяад наһанай хүбүүн басаган хоёрынь наһа барашоод ха. 

Иигэжэ үриеэ урдаа хараһан энэ хүгшэн ехэтэ сүхэрбэ:”Алин гээшэб, наһаараа үйлэдэһэн буянаймни аша үрэ”,-гэжэ уйлаба. Тиигэжэ нэгэ ехэ ламадашье хэлэбэ ха. Тэрэ лама айладаһан гэхэ:”Буян үйлэдэхэдөө, ямаршье зорилгогүй хэһэншни үгы болошоһон байна.

Тиигээдшье урда наһанай үйлын үри хүсэтэй, зайлахагүй буян, бурханда сүхэрхэ гээшэ ехэ нүгэл юм, аша зээнэршни олон халуун амин зон байна ха юм”,-гэһэн байгаа. Олон зоной һаналаа хүрэжэ хэһэн буян һайхан сэдьхэлэй нүлөө гээшэ нюдэндэ харагдахашьегүй һаа, байһан гэр соогоо, хото хорёо соогоо, нютаг нуга соогоо агаартань тунажа, буян шэнгэжэ, һайн һайханиие асардаг.

Энээнэйл түлөө хэһэн буянаа олондо зорюулна ха юмбибди. Гансал өөрынгөө аяга соохоноо хоол суглуулха бэшэ, олонойнго тогоондо үргэхэ гэһэншүү удхатай болоно. Уншаһан хүндэ туһа болохо болтогой гээд Дамбинима ахайн захяа дамжуулбаб. Ум маани бадмэ хум!

Намжилма Бальжинимаева

ССЫЛКА:  = обоо тахилга